Sorkar hnua chhungte ringawt hmangaih hi MNF chuan kan ti ve thiang lo - K Vena

MNF Natonal Core Committee member K Vanlalvena, Rajya Sabha MP chuan, sorkar hmaa ram hmangaih chiam a, sorkar hnua chhungte ringawt hmangaih chu MNF-in an tih ve a thian loh thu leh kum 2023 inthlanah MNF an sorkar leh ngei dawn thu a sawi.

K Vanlalvena hian nimin khan Mizo Hnam Rûna inkhawmah thu sawiin, "Sorkar hmaa ram hmangaih hlur a, sorkar hnua chhung leh khat ringawt hmangaih hi Pathian leh mipui duh loh zawng a ni a, MNF chuan kan ti ve thiang lo," a ti.

MNF sorkar chhungin hripuiin kum hnih chuang zet Mizoram a nuai tih sawiin Vanlalvena chuan, "Sorkar hmaa kan intiam ang kha eng emaw zat tih theih lohin a awm. MNF hian nakkum kum tàwp inthlanah sorkar leh ngei kan tum a, Pathian leh mipui zarah kan sorkar leh ngei dawn a ni," a ti a; an intiamnate hripui lên vanga an tih theih rih lohah mipui hriatthiamna a dil.

K Vanlalvena chuan, kum 2018-a MNF an chak chhan sawiin, "Congress sorkar zu zawrh kha mipui leh kohhranin an ning hle a, kan sorkar chuan kan titawp ang kan ti a, kan sorkar a, kan titawp nghal. SEDP kha kut hnathawktute dâwm kân nan kan aupui nasa hle a, hripui vangin kan duh angin kan kalpui mai thei lo a, tunah hian a tahtawlin kan kalpui mek zel a ni," a ti.

ZPM hruaitute'n an sorkar tur thu puang ṭhin mahse an la sorkar lo tih sawiin, "Sorkar leh sorkar loh chu puan vak vak aiin, Pathian thu thu a ni zawk," a ti bawk.