ZPM Ṭhalaiin ui fing atana senso Sum khawh ralnaah an ngai

ZPM Ṭhalai chuan thuchhuah siamin, Mizoram sorkarin hnu chhuina atana hman ṭangkai tura a lei ui (narcotics detection dog)-te chu hlawhtlinpui a nih loh avangin sum khawh ralna nia an ngaih thu an tarlang.

ZPM Ṭhalaiin an tarlan danin, RTI Act hmanga zawhna sorkarin a chhan dan chuan, MNF hruai sorkarin sorkar laipui aṭanga sum hmuh hmangin August 2, 2019 khan ui fing pariat a lei a; Aizawl, Champhai leh Kolasib-ahte operation-ah hruai ṭhin an ni.

Ui leina man, thil zirtirna senso, chaw man, damdawi man leh in sakna senso atan Home department-in Rs 18,40,000 an sèng tawh a; chaw leh thil dang mamawhah Home department chuan cheng nuai 4 chuang a séng tawh bawk.

Narcotic detection dog-te chu tun thlengin ruihhlo chhui chhuah kawngah leh thil dangah hlawhtlinpui (achievement)-na chhinchhiah tlâk an la neih loh thu RTI Act zawhna chhannaah tarlan tel a ni.

ZPM ṭhalaite chuan, chhawrna mumal awm si loa ui man tam lei a ni chu sum tam tak luan ralna nia an hriat thu sawiin, "MNF sorkar hmasaka police mawza man tam leh êk-in kal theite nen khan sum siamna leh thil thuhmunah kan ngai. Mizoram sorkar chu a enkawl thiam bâk thil leh sum siamna ni àwma langah inhambuai tawh lo a, mipui hlâwkna tur leh ṭhatna tura chak taka hna thawk zawk turin kan ngen a ni," an ti.