Hmasawnna rualkhai thlentir a ṭul - ZPM Vice President

ZPM vice president Lalthansanga chuan, Mizoramah hmasawnna rualkhai thlentir a ṭul thu leh Pathian duh dan angin Mizoramah hnam tênau zawkte hmakhua ngaihtuahpui a ngaih thu a sawi.

Nimina ZPM pisaa inkhawmah Lalthansanga chuan thu sawiin, "Politics kal sual vanga unaute inthinhrik lek leka kan awm ṭhin hi pa chan chang taka kan ngaihtuah a ngai. Nasa zawka Pathian hruaina kan chan theih nan a duh dan angin kan unau chi/hnam tênau zawkte hmakhua ngaihtuahpui a ngai. Zoram hi kan ram a ni a, hnam tin, chi tinte tan nu leh pa nih kan tum a, dan hnuaiah hei hi a tak rama chantir kan tum dawn a ni," a ti.

Lalthansanga chuan, Myanmar ram buai vanga rawn tlanchhiate chu Mizoram mipuiin an en danah danglamna a awm em tih ngaihtuah a ngaih thu sawiin, "Zo hnahthlakte inpui kan nih angin kan lo dawnsawn dan leh kan khawsakho zel dan ngaihtuah chian a ṭul hle. Mizoramah minority unaute an awm a, an tan kulhbíng sang kan nihna tur leh dan hnuaiah thlamuang taka an awm theihna turin ngaihtuahna kan sen a ṭul hle bawk," a ti a; hmasawnna khairual sorkarah hnam pual intih bik a ṭul tawh loh tur thu a sawi.

ZPM Vice President chuan, ZPM Southern Headquarters inthlan chungchang sawiin, "Boruak ṭha tak hnuaiah committee thuchhuak ang zelin, theihtawpin engkim fel taka tih a ni," a ti.

Nimina ZPM inkhawmah hian K Laltluangkima, Mission Veng chu ZPM party-ah lawm luh a nih thu ZPM thuchhuah chuan a tarlang.