Kum 2022-2023 atan SEDP Board 14-te Inenkawlna tur cheng nuai 303.93 pe

Mizoram sorkarin an flagship programme Socio Economic Development Programme (SEDP) policy tipuitling tura a din SEDP Board 14-te hnenah kum 2022-2023 chhunga an inenkawlna senso atan cheng nuai 303.93 a pe a; board vice-chairman zinga MLA ni lo palite hlawh atan kum khatah Rs 19,20,000 sên a ni.

Planning department leh Finance department-a SPIO ten RTI Act 2005 hmanga zawh­na an chhan danin, Plan­ning department chuan kum 2022-2023 atana SEDP Board 14-te inenkawlna senso tur Rs 3,03,93,760 chu Finance department hnenah an recom­mend-a, Finance depart­ment chuan May 9, 2022 khan pawisa hi a pe chhuak a ni.

SEDP Board 14-ah hian chairman chu a kaihhnawih minister an ni a, board 14 zinga 10-ah hian vice chairman atan MLA ruat niin; minister leh MLA-te hian a hranpain board-ah hian hlawh an nei lo.

Board 14 zinga pali - Industrial Development Board, Sports, Youth Affairs & Tou­rism Board, Land Revenue & Survey Board leh Social Reha­bilitation Board-ah te hian vice chairman atan MLA ni lai mek ni lo, MLA hlui pali ruat an ni a; thla khatah Rs 40,000 ṭheuh an hlawh a, kum khata an pali hlawh belhkhawm chu Rs 19,20,000 a ni.

Board pakhatah hian LDC pahnih leh IV Grade pahnih ṭheuh an awm a, LDC-te hian thla khatah Rs 16,920 ve ve leh IV Grade-te hian Rs 11,990 ve ve an hlawh. Board tinte hnenah lirthei hire-na man atan thla khatah Rs 70,000 leh office expenses atan kum khatah Rs 5,00,000 pek a ni bawk.

MLA ni mekin an enkawl board 10-te enkawl nan kum 2022-2023 atan Rs 2,03,38,400 leh MLA ni lote enkawl board palite tan Rs 1,00,55,360 pek a ni a; SEDP Board 14-te inenkawlna tur hian kum 2022-2023 atan sorkarin avaiin Rs 3,03,93,760 a pe a ni.