Finance-in scholarship pawisa Scholarship Board-ah an la pe lo
Finance depart-ment chuan Ministry of Tribal Affairs-in October 4, 2022-a a pek chhuah - kum 2021-22 scholarship third instalment leh kum 2022-23 scholarship atana central share (50%) chu Mizoram Scholarship Board (MSB) hnenah an la pe lo.
MSB aṭanga Vanglaini thudawn danin, Finance department hnenah scholarship sumte hi an hnena pe turin an dil mek a ni. An account-a a luh veleh MSB chuan zirlaite account-ah an scholarship tur hi an thun nghal dawn a ni.
Sorkar thuchhuah tarlan danin, October 4, 2022 khan Ministry of Tribal Affairs chuan Post Matric Scholarships to Scheduled Tribes Students scheme hnuaia kum 2021-22 a sum pek bang, 3rd instalment cheng nuai 794.84 leh kum 2022-23 atana central share tur 50%, cheng nuai 1,823.89, belhkhawmin cheng nuai 2,590.31 chu a release a ni.
Higher & Technical Education minister Dr R Lalthangliana chuan tun hnaia Delhi a zin ṭumin post matric scholarship sum hi pe chhuak turin sorkar laipui a zuk nawr a ni.