Minister-in mitdelte lehkhabu a sem

School Education minister Lalchhandama Ralte chuan nimin khan a pisa-ah Blind School-a zirlaite hnenah mitdelte hman tura siam zirlaibu, braille textbook a sem.

Lalchhandama chuan, Mizo­rama mitdel zirlaite'n an chhiar theih tur zirlaibu an neive ta chu Mizoram tana chhinchhiah tlak tak a nih thu sawiin, "Mitdelte'n zirlaibu an neih hmasak ber a ni a, an tan chuan chanchin ṭha a tling. An khawvel hmalam a tieng hle dawn a ni. High school zirlaite tan pawh Samagra Shiksha-te nen hmalakzui a ni dawn," a ti.

Education Minister chuan mitdelte chu mi pangngaite nen inelna ṭha an neih theih tawh dawn avangin harsatna karah miropui tak tak an chhuak ṭhin tih hre reng tura chahin, "Braille textbook in neih thar hi khawvel hriata in talent pho chhuah nan a ṭangkai ngei ka beisei a ni," a ti a, he textbook thar hmang hian mitdelte hian khawtlang tan pawh rah ṭha zawk an pek chhuah theih ngei a beisei thu a sawi.

MBSE secretary Sarah Lalzam­puii sawi danin, tun dinhmunah hian braille textbook dawng tur zirlai higher secondary leh high school-ah pang ve ve an awm. Large font print textbook dawng thei tur higher section-ah mi paruk leh high school-ah mi pasarih an awm bawk.

PwD Commissioner chuan April 2022 khan braille textbook buatsaih turin MBSE-ah a thlen a, chumi bawhzui chuan MBSE-in Dedradun-a National Institute for Empowerment of Persons with Visually Disabled (NIEPVD) te an dawr a ni. Braille textbook semte hi history, political science, English leh sociology subject-te a ni.