Health Minister in TB endikna khawl a hawng

Health minister Dr R Lalthangliana chuan October 10, Thawhṭanni khan Falkawna District TB Centre-ah TB endikna khawl thar - Culture & Drug Susceptibility Laboratory a hawng. Minister chuan, kumin January aṭanga June thla chhung khan TB damlo 1,000 chuang hmuh chhuah an nih thu leh mi 39 an thih tawh thu a sawi.

Dr R Lalthangliana chuan, National TB Elimination Programme hnuaiah TB enkawlna chuan bungthar kaiin, TB endikna khawl thar chu Mizoramah a hmasa ber tur a nih thu a sawi a, "He khawl hi a nihna anga hman theih a nih hunah TB damdawi hrang hrangte damlo in a ngeih leh ngeih loh turte a hriat theih vek dawn. Kumin January aṭanga June thla chhung khan TB damlo 1,000 chuang hmuhchhuah an ni a, heng zinga 60 chuang chu MDR-TB niin mi 39 an thi tawh," a ti.

Khawvel pum huapa TB umbo tumna kum 2030 aia kum nga a hma 2025-ah India ram chuan umbo a tum tih sawiin Health Minister chuan, "Kum 2015 aṭanga khaikhinin kum 2025-ah chuan TB vanga thihna chu 90% a tihhniam tum a nih bakah, TB natna thleng ṭhin hi 80% a tihhniam tum a ni bawk," a ti a, Mizoram aṭanga TB umbo turin hmalakna tur thui tak a la awm thu leh ṭanrualna leh tih tak takna nen umbo a nih theih a beisei thu a sawi.

Minister chuan, TB test-na laboratory hi ruahman dan chuan kum 2020 June thla vel aṭanga hman theih tura tih a ni a, Covid-19 test nan hman lailawk a nih avangin hun a kal thui ta hret niin a sawi bawk.

TB endikna khawl C&DST Laboratory-ah hian Drug Resistant TB (MDR-TB) leh TB pangngaite hmuh chhuah theih a ni dawn. TB damdawite'n TB hrik a that thei nge that thei lo tih te, damlo in damdawi a ngeih turte zawn chhuah theih a nih bakah, TB damlote an inenkawl laiin an damdawi ei lai an ngeih leh ngeih loh test zui reng nan hman theih a ni bawk ang.