ZPM Leader leh Working President-in Champhai leh a chhehvel an fang mek

Zoram Peoples' Movement (ZPM) leader Lalduhoma, MLA leh working presi­dent K Sapdangte chuan Champhai leh a chheh­vel khua an fang mek a, nimin khan North Khawbung leh Neihdawn khua-a vantlang inkhawm buatsaihah thu an sawi.

Lalduhoma chuan an party policy chungchang sawiin, "Kan policy-ah hmasawnna ruangam lian tak tak kan nei a, chung zinga kan ngaih pawimawh em em chu power-a intodelh a ni. Kum nga chhunga power-a kan intodelh theihna turin hma kan la dawn a, industry tenau deuh emaw, entre­preneurship lam pawh ti dawn ila, power-a kan intodelh a ngai a ni," a ti.

Mipuiin bul an ṭan ve theihna turin theihtawpa an puih dawn thu sawiin ZPM Leader chuan, "Zoram mipuiin kan mamawh chu bul min ṭansaktu tur a ni. Chhungkaw tinin tih theih zawng leh tui zawng kan nei vek a, amaherawhchu bulṭannaah kan buai ṭhin," a ti a, bulṭanna tura buaite chhanchhuahna tur policy ṭha tak 'bana kaih' an neih thu a sawi.

Lalduhoma chuan bana kaih policy chu a thlawna sum sem lam a ni lo tih sawiin, "Puih tlak leh hlawhtlin tum tak tak ho hi kan enfiah ang a, kan pui mai dawn a ni. Kan ram sik leh sa milin thlai kan ching ang a, a hlawhtlin ngei theihna tur chinah zel kalpui kan tum. Kan ram zimte hi mumal taka enkawl hi a harsa lo," a ti.

ZPM working president K Sapdanga chuan tunlai Mizoram politics virvel thlirin, mipuite'n kalphung thar an mamawh tawh a ni tih chiang taka hriat theih a nih thu sawiin, "Kalphung thar siam a, kan ram kaihruai turin ZPM-te hian theihtawpin ṭan kan la a ni," a ti a, Mizo- ram polictics-ah Pathian ram a thlen theihna atan chunglam malsawm tlaka rim taka thawh a ṭul thu a sawi.

Pathian ramin ngeih loh a ngah tih sawiin ZPM Working President chuan, "Hlemhletna a ngai thei loa, dawt a haw hle bawk a ni,” a ti. K Sapdanga chuan mi ṭhenkhatin engkim hi lei theih niin an ngai nia sawiin, "Mi duhthlannate pawh hi lei theih niin an hria. Mipuite pawh hian kan vote hi kan hralh a nih chuan kan thluakah sum a lut ve tihna a ni a, tumah inhmusit thei kan awm bîk lo tihna a ni ang,” a ti a, thluaka sum lut hruaitute leh thluaka sum lut mipuite indawr chuan ram hmangaihin awmzia a neih loh tur thu a sawi.

Congress party chungah lawmthu sawiin K Sapdanga chuan, "A chhan chu policy kan duang a, a hmingah Sustainable Development & Reform Policy (SDRP) kan ti a ni. Kan tlangzarh hnu chiah aṭangin Congress party hian min sawi sak nasa em em a, hmun tinah min sawi lar sak nasa a ni,” a ti bawk.

ZPM thuchhuah tarlan danin, an party hruaitute hian Neihdawn khuaah mi 28 an party-ah an lawmlut a ni.