Union Minister-in teak leh thingzai pangngaite restricted list-ah a tel lo tih Larsap a hrilh

Governor Hari Babu Kambhampati-a'n Union Minister of Commerce & Industry Dr Piyush Goyal hnena Zokhawthar kaltlanga teak leh thingzai dangte lakluh a nih theihna tura ngenna lehkha a thawn chu Union Minister hian tunhnai khan a rawn chhang a; Union Minister chuan teak leh thingzai pangngaite chu restricted list-ah a tel loh thu a rawn hrilh.

Sorkar thuchhuah tarlan danin, Mizoram Woodbased Industry Owners Association (MWIOA) chuan Zokhawthar aṭanga teak leh thingzai chi dangte lakluh kawnga harsatna an tawhte chu June 21, 2022 khan Governor hnenah ziakin an thlen a; Governor hian July 23, 2022 khan Union Commerce Minister hnenah ziakin an harsatnate sutkian sak tura ngenna a thlen a ni.

September 29, 2022-a Governor hnena chhanna lehkha a rawn thawnah hian ngennate a lo zirchian tawh thu a rawn sawi a; thing chi hnih - Article HS 44039918 tia chhinchhiah (rough wood of red sanders) leh HS 44039922 (rough wood of Sandalwood)-te chu import policy hnuaiah bungraw lakluh khap a ni a, a bak thingzai dang zawng leh thingzai aṭanga thilsiamte chu Zokhawthar Land Customs Station kaltlangin khuahkhirhna awm loin lakluh theih a nih thu a rawn ziak a ni.

Union Commerce Minister chuan, Custom Act, 1962 hnuaiah Zokhawthar Land Customs Station chu Land Customs Station atan puan a nih tawh thu leh thingzai chungchang a rawn tarlante kaihhnawih thilah bawhzui tur a awm chuan chak taka bawhzui a nih tur thu a rawn ziak bawk.