Champhaiah RTI Week hawng

Champhai DC, Mizoram Information Commission (MIC) leh Champhai DIPRO pisate chuan nimin khan IPR auditorium-ah Right to Information (RTI) Act, 2005 Week hawnna leh inhrilhfiahna hun an buatsaih a, MIC secretary H Dolianbuaia'n a hmanpui.

H Dolianbuaia chuan, RTI Act Sec 4 in a phut anga an website lama hmala ṭha lo department 41 vel koh an nih tawh thu a sawi a, "RTI Act hmalakna hi hna penhleh angah ngai loin, hna kalphung pangngai, office hna zinga bet tlat a ni tih hre reng ang che u," a ti a, RTI zawhna zawttute puih leh mamawh pek chhuah kawngah theihtawp chhuah turin a chah.

Langtlang sorkar din kawngah sorkar hnathawkte chuan an mawhphurhnate hlenin an hnathawh dan dik takte an tarlang ṭhin tur a nih thu sawiin MIC Secretary chuan, "Thuneitu sang zawka thlen kher ngai lo turin ṭan la ang che u. RTI zawhnate dan hnuaiah ṭha takin chhang ula, mipuiin an chanvo neih an chan loh hi thil pawi tak a ni," a ti a; DAA, SPIO leh SAPIO-te chu mumal taka inruat tur leh dawrtute tana hriat mai theih tura inkawhhmuhna siam vek tura tih an nih angin sorkar pisate hmalakna endik tum a nih thu a sawi bawk.

State Tax assistant commissioner C Lalṭhazuala, district resource person tarlan danin, RTI Act chu langtlang sorkar a awm theih nan leh mamawhna avanga nawrchhuah a ni a, kum 17 hmel a hmuh hnuah pawh hemi dan chhawr ṭangkai thiam tura inzirtirna kalpui nasat a ṭul. RTI Act chu dan malsawm, khua leh tuite chakna leh thiltihtheihna petu a ni.

Pawl hming anga RTI Act kaltlanga zawhna siam theih a ni lo a, mimal anga zawhna siam a ngai. RTI zawhna luh aṭanga ni 30 chhungin document leh material awm sa leh neih chin aṭanga chhanna pek chhuah tur a ni. Zawhna chhan danah vuivaina a awmin thuneitu sang zawk thlenga thlen zel theih a ni a, zawhna chhan duh loh leh chhan tlai thlengin hremna a awm.

He hun hi SDC Esther Leihang in a kaihruai a, Champhai Vengthlang Corps Salvation Army Youth (SAY)-te'n RTI street play an entir a ni.