ICFAI Chancellor-in Larsap a kawm

Governor Hari Babu Kambhampati chu nimin khan Raj Bhavan-ah ICFAI University Mizoram chancellor thar Prof. Haragopal Reddy leh a thawhpuite nen an inkawm.

Governor chuan, ICFAI-ah hian ṭhalaite'n eizawnna atan leh hnathawh tur hmuhna atana ṭangkai tur zirna - skill development lam, a bikin healthcare leh hospitality sector lamte uar se a duh thu a sawi.

Hari Babu Kambhampati chuan, ICFAI Mizoram hotu hmasate nen inkawmna an lo neih tawh ṭhin thu leh an dinhmun pawh eng emaw chen a hriatpui thu a sawi a; theih tawp chhuah zel turin Chancellor thar leh a thawhpuite a chah.

ICFAI University lo chu Mizoramah private university dang a awm loh thu sawiin Governor chuan, "ICFAI mawhphurhna chu a sang hle. ICFAI Mizoramah hian ṭhalaite'n eizawnna atan leh hnathawh tur hmuhna atana ṭangkai tur zirna - skill development lam, a bikin healthcare leh hospitality sector lamte uar ula ka duh a ni," a ti bawk.

ICFAI Chancellor thar chuan ICFAI Mizoram hmasawnna turin theihtawp chhuah a tum thu a sawi a, kumin November thlaa convocation an neih turah Governor chu khuallian atan a sawm nghal a ni.

Inkawmhonaah hian ICFAI University Mizoram vice chancellor Prof. RP Vadhera, director Dr Damodar Reddy leh registrar Dr David Lawmzuala te an tel a ni.