Lawngtlaiah handloom expo buatsaih a ni

Nimin khan Lawngtlai Bazar Venga Dokulha Hall-ah National Handloom Development Programme (NHDP) kal tlanga Mizoram Handloom & Handicrafts Development Corporation Ltd (ZOHANDCO) buatsaih State Handloom Expo 2022 chu LADC chief executive member V Zirsanga'n a hawng.

V Zirsanga chuan ZOHANDCO hmalaknaa Mizoram chhunga kut themthiam leh la deh thiamte tana eizawnna kawng hawn zau zel a ni chu lawmawm a tih thu sawiin, "In hna thawh hi kut hnathawh chawi sanna leh hnam zia-rang humhalhna pawimawh tak a ni," a ti.

Mihring thiamna, thahrui leh hun tam tak sen a ṭul avangin hnam changkang apiangin kuta thil siam an ngaisang tih sawiin V Zirsanga chuan, puantah leh kut themthiam thil siam chhuah kawngah mahni intodelh mai ni loa, ram danga thawn chhuah tham leh thawn chhuah tlak neih tum turin puan tahtu kal khawmte a chah.

Thusawitu dang, ZOHANDCO chairman C Lalrammawia chuan, sorkarin a ṭulna leh pawimawhna a hriat avangin ZOHANDCO tihtawp tawh chu tharthawh lehin, tunah chuan ṭhangduang takin hma lakna hrang hrang an kalpui mek tih sawiin, "A ṭhan zelna atan mawhphurtu chu Mizoram mipuite an ni. Mahni hnam thil ngaihhlut leh ngaihsan nachang hriat thar deuh deuh a pawimawh," a ti.

Ni li awh tur State Handloom Expo 2022-ah hian dawr 31 hawn niin, he'ng dawrahte hian Mizoram hmun hrang hrang aṭangin tualchhuak puan leh thawmhnaw lam bakah, kut themthiam thil siamte man tlawm zawkin zawrh chhuah a ni.