Kan hlawh ennawn a nih danin Kan beisei a pha lo - FEMSE
Federation of Mizoram Samagra Employee (FEMSE) chuan thuchhuah siamin, Samagra hnuaia thawkte hlawh ennawna, tihsan an duhna sorkara an lo thlen ṭhin chu hun rei tak chhung buaipui a nih hnuah tihhlawhtlin a nih thu tarlangin, "A lawmawm kan tih rualin hlawh min ennawn sak dan erawh kan beisei a pha loin lungawi harsa kan ti hle," an ti.
Kum 2019 khan Samagra hnuaia thawkte hlawh leh service chungchanga hmasawn ve duh avangin mass casual leave lain lungawi lohna an lo lan tir tawh tih tarlangin FEMSE chuan, "Chumi kal zelah chuan kum 2022 kumah Cabinet meeting-ah Samagra hnuaia thawkte hlawh chu ennawn niin, hlawh tisang loin allowances pek kan ni," an ti a, sorkar sum harsatnate hre rengin, hripuiin a tihbuai avangin nawrh leh mawi lo zawnga chet lakna engmah an neih loh thu an sawi.
FEMSE chuan sorkarin sum harsatna nasa tak a nei chung pawha an hlawh ennawn sak an ni chu lawmawm an tih thu sawiin, "A tir aṭanga hma min laksaktu Chief Minister leh Education Minister chungah lawmthu kan sawi a ni. Hetih mek lai hian Samagra hnuai thawkte hlawh min ennawn sak danah erawh lungawi theih niin kan hre lo. Kum 10 aia rei mah hlawh ngai hlawhten, kan hlawh a san ve beisei a nghakhlel taka kan lo thlir ṭhin chuan beisei a phak lo hle in kan hria," an ti.
FEMSE chuan allowances-ah dearness allowances 15% chauh pek an nih thu tarlangin, "Samagra hnuai thawkte hi kan thawhna ṭheuhah rinrawl leh hmun pawimawh tak luah kan nih vek laiin dearnerss allowances erawh thawh-puite neih ang zat kan nei ve lo erawh hriatthiam harsa kan ti hle," an ti a, seniority anga additional allowances sorkarin a pek pawh lungawina khawp nia an ngaih loh thu an tarlang.
Nghakhlel taka an lo thlir ṭhin chu beisei loh lamah kaihthluk sak an nih thu tarlangin FEMSE chuan, "Hlawh min ennawn sak dan hi hriatthiam harsa kan tiin, sorkar hian min ennawn sak leh se kan duh hle a ni. Dearness allowances mai ni lo, hlawh (basic) pawh min tihsan sak ngei turin sorkar kan ngen tak meuh a ni," an ti.