KHAWTHLIR
Thisen pe
Baptist Youth Fellowship (BYF), EBCC, Aizawl chuan kumtina an lo tih ṭhin angin nimin khan BYF Day, 2022 pualin Civil Hospital, Aizawl tan thisen unit 38 an pe. Thisen petute hi mipa 29 leh hmeichhia pakua an ni.
MLA-in enfiah
Aizawl South-III bialtu MLA Prof. F Lalnunmawia chuan nimin khan a bial chhung veng leh khaw ṭhenkhata hmasawnna hnathawh leh hmachhawpte a enfiah. Prof. F Lalnunmawia chuan tun sorkar term kal mekah kum 2 chuang Covid-19 vangin beisei anga hmalak chak theih a nih loh thu sawiin, "Tun kum khat vel hun kan la neih chhung hian khua leh veng hrang hrangah theihtawpa hmasawnna hna thawh kan tum dawn a ni," a ti.
Zirtirtu training
Siaha District Institute of Education and Training (DIET) chuan nimin khan IPR conference hall-ah middle school-a mathematics zirtirtute tan training an buatsaih a, zirtirtu 50 an tel. Training hi ni li chhung neih tura ruahman a ni.
Kuhva ro man
Sairang Police-te chuan October 9, 2022 zan khan lirthei (pick-up) pakhat aṭangin dan loa lakluh kuhva rah ro ip 26 leh lirthei khalhtu Lalenkawla (40) s/o Rochungnunga, Hunthar veng leh kuhva rah neitu Lalramhluni (37) w/o Rothangliana, Rangvamual Mel 5 te an man. Police-te chhuizuina leh a neitu zawhfiahna aṭangin Phunchawnga kudam pakhat aṭangin ip 90 dang an man leh bawk.
EFCI Council
Evangelical Free Church of India (EFCI) kohhran rorelna sâng EFCI Executive Council vawi 107-na chu vawiin aṭangin Lunglei EFCI biak-in, Electric Vengah neih a ni dawn a, naktukah chhunzawm a ni ang. Tun ṭum hi Mizoram chhunga EFCI Executive Council nghah a nih hmasak berna a ni.
Plumber training
PHE department hnuaia Programme Management Unit (PMU) leh SIRDPR ṭangkawp chuan nimin khan Durtlanga SIRDPR hmunah 'Skill Training for Electrician & Plumber General under Jal Jeevan Mission (JJM)' an buatsaih a, plumber zir tur mi 27 leh electrician zir tur mi 19 an awm.