Kawrthah ram thlama Nupa thattu la chiang lo

October 14, 2017 zinga Kawrthah rama thláma thia an chhar, Hmingchungnunga (64) leh a nupui Rozikpuii (56), Ramhlun South, Aizawlte thattu chu hriat chhuah a la ni lo. Hetih lai hian, police-te chuan Hmingchungnunga te fapa Lalnunmawia (31) chu thu zawhfiah atan an la a, an la kawl mek.

Police hotute hnen aṭanga thu dawn danin, Hmingchungnunga te nupa tualthihna chung­chang hi ngawrh taka chhui mek a ni a, buaipui ngai hrang hrangte buaipui zui zel a ni. Tualthattu chhui chhuah a nih ngei theihna atan finfiahna ngawrh taka zawn zel a ni.

Social media lama Hmingchungnunga (64) fapa Lalnunmawia'n a tih a nih thu a puang tawh nia thu thehdarh awm chung changah police hotute chuan, "Keini chuan a inpuang kan la ti lo. Uluk taka hnu chhui hna thawh mek zel a ni," an ti.

Hetih lai hian, Mamit police-te'n cable TV pakhat an hrilh danin, Hmingchungnunga te nupa vui a nih hnuah an fapa Lalnunmawia chu police-te'n Bawngkawn Police Station-ah an la a, Bawngkawn PS-a a inpuan hnuah Mamit Police Station-ah lak a ni a, IPC Section 302 (tualthah thubuai) hmang­in thubuai siamsak a ni.