Robert Hrangdawla bail-a chhuah a ni

Khehpuam (pseudoephe­drine) lei leh hralh thubuaia October 4, 2017-a man leh Central Jail-a dah luh, Robert Hrangdawla, IAS (Rtd.), Mizoram Chief Information Commissioner hlui bail dilna chu nimin khan ngaihtuah a ni a, Special Court (Drugs & Cosmetics Act) judge Vanlalenmawia'n bail-a chhuah lailâwk a phalsak.

Robert Hrangdawla hian October 11, 2017 khan bail a dil a, a ukil chuan Robert Hrang­dawla chu hun rei tak aṭanga zunthlum nei a nih thu sawiin, a thusawi tihchianna atan medical prescribtion leh laboratory investigation report Court-ah a thehlut a ni.

Court chuan, Robert Hrang­dawla chu Central Jail-ah a awm tawh avangin, medical report-te chu jail doctor hnen aṭanga a neih tur a ni a, mahse, a zunthlum endik turin jail aṭanga hruai chhuah a nih loh avangin bail a phalsak rih lo.

Hetiang a nih avang hian Court chuan, Robert Hrang­dawla'n zunthlum a nei ngei em tih a finfiah theih loh avangin, sorkarin a din Medical Board endik turin thutlukna a siam a ni.

Bail dilna hi October 13 khan ngaihtuah tura tih a ni a, mahse, Medical Board lamin Robert Hrangdawla hriselna dinhmun an la endik loh avangin ngaihtuah theih a ni lo.

Nimin khan Medical Board chuan Robert Hrandawla hriselna dinhmun an endik a, an endikna lehkha chu Court-a thehluh a ni. Court chuan Robert Hrangdawla chu jail-a táng turin a hriselna a ṭhat tâwk loh bakah, IAS officer hlui, kum eng emaw zat ram tana rawng lo báwl tawh leh thil ṭha tam tak lo ti tawh a nih avang leh, kum 73 mi a nih tawh avangin bail-a chhuah lailâwk a phalsak a ni.

Bail-a chhuah a nih chhung hian Robert Hrangdawla hi thil ṭha lo nia lang reng reng lakah inthiar fihlîm tur te, a thubuai chhuina tichhe thei zawnga thil ti lo turte leh, Court phalna la hmasa loa Aizawl chhuahsan lo tura hriattir a ni.