Mizorama zirna tihhmasawnna turin TV programme atan thuthlung ziak

Zirna tihhmasawn nan leh zirna lama sorkar hnathawh puanzarna turin, nimin khan School Education department leh Doordarshan Kendra (DDK), Aizawl ten television programme kalpui turin School Education conference hall-ah thawh dunna thuthlung an ziak a, School Education minister H Rohluna'n a hmanpui.

H Rohluna chuan, zirna tihhmasawn nan sorkarin theih­tawpin hma a la zel tih sawiin, hmalakna pakhat, TV prog­ramme chu kum 2015 aṭangin hlawhtling taka kalpui a lo ni tawh tih a sawi a; kumin atana thawhhona thuthlung ziah thar leh pawh hlawhtling taka kalpui ngei a nih a beisei thu a sawi.

Educational TV programme hi July 17, 2015-ah School Education department leh DDK ten thawh dunna thuthlung an siam angin kalpui a lo ni tawh a, hemi atan hian Mizoram sorkarin Programme Advisory Committee a din. Committee-ah hian School Education department, SCERT, MBSE, SSA leh RMSA-te an tel.

Programme atan hian district tinah District Educational Television Programme Committee (DETPC) din a ni a, District Education Officer ṭheuhte'n an kaihruai a; district chhunga zirna hmasawnna leh hmalaknate programme-a chhuah tura duan ṭhin a ni. TV programme enkawl tur hian Media Cell din a ni a, August 27, 2015 aṭanga September 2017 thleng khan episode 103 tihchhuah a ni tawh.

TV programme tihchhuahna atana sensote chu School Education, SCERT, MBSE, SSA leh RMSA-te'n an intum sem a; nimina thawh dunna thuthlung ziah thar hian September 2017 aṭanga October 2018 thleng a huam ang.

Thuthlungah hian School Education department aiawhin secretary Esther Lal Ruatkimi'n hming a ziak a, DDK aiawhin head of programme Womchan Ramsan-a'n hming a ziak. Thu­thlung ziahnaah hian MLA Joseph Lalhimpuia leh School Education director K Lalthawmmawia te pawh an tel a ni.