Oil palm chíngtute intâwkkhawm

Nimin khan Ser­chhipa Agriculture conference hall-ah district level Oil Palm Growers’ Meet 2017 buatsaih a ni a, Agriculture (Crop Husbandry) director J Lalzamliana'n a hmanpui.

J Lalzamliana chuan, Serchhip district-a oil palm chíngtute behchhan ber 3F Agrotech Pvt.Ltd. an inhnûkdâwk chu pawi a tih thu sawiin, "Oil palm chíngtute harsatna chu sorkarin a ngaihthah lo a, Godrej Agrovet Ltd., Bukvannei, Kolasib biak an ni a, an huam chhunga awm ni lo mah se, Serchhip district-a oil palm-te chu kg. khat Rs. 5.50-in an lei sak dawn a ni," a ti.

Hun hmasa lamah oil palm rahte chu hmun leh hmuna leisak an nih ṭhin laiin, chutiang reng chuan a kal theih dawn loh tih sawiin J Lalzam­liana chuan, "Sorkar lamin a lak khawmna hmun tur a siamah lo neitute'n la khawmin, chuta ṭang chuan a hlâwm­in Bûkvannei lamah phurhsak an ni ang," a ti a; a phurh man chu NEDP sum aṭangin sorkarin a peksak dawn thu a sawi.

Inkhawma tarlan dan­in, Agriculture department chuan kum 2013 aṭanga 2017 chhungin oil palm rah kg. 95,818 an hralh tawh a, a hralhna man chu Rs. 4,81,734.25 a ni. 3F Agrotech Pvt.Ltd -in Rs. 3,57,753.00 an la batsak mek.

Serchhip district-ah hian khaw 11-a kut hnathawktu 581-in oil palm an chíng a, an zing­ah hian Buangpui leh Hriangtlang khua aṭanga kut hnathawktu 21 tih loh chuan oil palm rah hralh tur an nei tawh. Oil palm rahte lak khawmna hmun tur khaw hrang hrangah hmun 26-ah siam a ni.