Thlai zirchianna awm loin lo neitute Chìntir tawh loh ni se - KS Thanga
Agriculture department hnuaia Research & Extension (RE) scheme leh hnathawh dan thlirletna hun nimin khan Agriculture directirate conference hall-ah buatsaih a ni a; an hun hmanpuitu, Agriculture minister KS Thanga chuan, zirchianna awm loa lo neitute thlai chìntir ni tawh lo se a duh thu a sawi.
Agriculture Minister chuan, Krishi Vigyan Kendra (KVK) hnuaia scientist leh thawktute chu ram tana thawktu an nih hre reng a, theihtawp chhuah zel turin a chah a, "Zirchianna (research) leh tihchhinna (trial) awm loa lo neitute thlai leh thei chintìr hi awm tawh lo se a duhawm hle. Lo neitute ṭul loa tawrhtirna a ni," a ti.
Lo neitute'n an hnathawh dan a bul aṭanga a tawp thlengin bel takin an hre tur a nih thu sawiin KS Thanga chuan, "Hemi hlawlhtlinna atan hian ṭan lak lehzual a pawimawh. Lo neitute training pek leh lei enkawl dan tur hrilhhriat a pawimawh," a ti a; training buatsaih a nihin, tui zawka hna an thawh theihna tur ngaihtuah tel a pawimawh thu a sawi.
Meeting-ah hian kum khat chhunga KVK ten action plan an siam dan te, farmers training pek an nih thu te, kum 2017-2018 chhunga district pasariha KVK ten loneitute training an pek tur thute leh soil test an tum thute sawi lan a ni.
Agriculture department-a Directorate of Agriculture (Research & Extension) hnuaiah hian Education and Training-ah Integrated Training Centre (ITC), Hnahthial a awm a; Research and Training hnuaiah Krishi Vigyan Kendra (KVK) pasarih - Kolasib, Lunglei, Champhai, Lawngtlai, Siaha, Serchhip leh Mamit a awm bawk.
KVK kalpuina district pasarihah hian senior scientist leh hotu dang pakhat ṭheuh an awm a; department chuan technology hmangin district hrang hrangah training leh front line demonstration an kalpui a ni.