MoS rank pahnih neih dan kalh - PRISM

PRISM chuan thu­chhuah siamin, Mizoram sorkara minister 12 bakah, minister of state rank mi pahnih an awm chuan dan a kalh ngei nia a lan thu an tarlang a; hei hi Law & Judicial department pawhin dan a kalh lo tih an sawi thei lo niin an sawi.

PRISM chuan, office of profit te, Mizoram minister neih zat leh parliamantary secretary-te senso chungchangte Law & Judicial department-ah an zawt tih sawiin, "Political Adviser to Chief Minister atana Lal­rinmawia Ralte, MLA ruat chu Office of Profit (Section 191(1)(a) of the Constitution of India) kalh a nih loh thu an sawi. NLUP Implementing Board chairman-a JH Roṭhuama, MLA dah chu Office of Profit kalh a nih loh thu an sawi thei lo thung," an ti.

Minister 12 leh minister of state rank nei mi dang pahnih Mizoram sorkara an awm avangin Mizoramin minister 14 a nei ang a nih thu sawiin PRISM chuan, "Minister kan neih theih zat bi­thliah 12 (Section 164(1A) of the Constitution of India) bawhchhiatna a nih loh thu an sawi thei lo," an ti a; hei vang hian Mizoramin dan phal bak minister a nei ngei nia a lan thu an tarlang.

Heng thil chung­changa PRISM-in High Court an zawhna chu October 12, 2017 khan High Court-in chhanna an pe tih sawiin PRISM chuan, "Anni hi chuan Chief Secretary hnena zawtfiah turin min ti a. Hemi bawhzui hian October 17, 2017 khan Chief Secretary hnenah zawhna kan thlen," an ti.