KHAWTHLIR

Zovawk pawm
AH & Vety department chuan thuchhuah siamin, ICAR-National Bureau of Animal Genetics chuan ‘Zovawk’ chu vawk chi khat (breed) angin a pawm tawh tih an tarlang a, "ICAR hnuaiah hian Zovawk breed chu accession number ‘INDIA-PIG-2700-ZOVAWK-09007’ pek a ni," an ti.

Bawlhhlawh bawm sem
Serchhip district-a Keiṭum khuaa chhungkaw 443, zirna-in 10 leh BNRGSK Hall tan nimin khan PHE department chuan bawlhhlawh bawm 455 a pe. Bawlh-hlawh bawmte hi an khaw community hall-ah PHE EE F Sanglura'n a sem a, VCP Vanlalsailova hnenah cheng nuai riat senga bawlhhlawh paihna hmun siamna tur work order a hlan nghal.

Minister lawmpui
Mara District Youth Congress Committee, Siaha chuan, nimin khan tun hnaia minister of state-a ruat thar Vanlalawmpuii Chawngthu chu a pisaah lawmpuina leh chawimawina an hlan.

MHIP-in phût
MHIP general headquarters chuan thuchhuah siamin, Hmingchungnunga leh a nupui Rozikpuii, Ramhlun South-te October 14, 2017-a Kawrthah rama thah an ni chu pawi an tih thu leh an tu leh fate a tawrhpui thu an tarlang a, "Tualthattu zawng chhuak a, dan anga na taka hrem turin thuneitute kan phût tlat a ni," an ti.

CM relief fund
Mi harsa zualte ṭanpuina turin Serchhip Veng Chung Branch YMA leh Serchhip Chanmari Congress Unit-te chuan Rs.2,000 ve ve Chief Minister relief fund-ah an chhung lut.