Bairabi-Sairang inkar rél kawng December 2023-ah hawn tum a ni

Bairabi leh Sairang inkara rél kawng siam mek chu nimin khan MJA member-te'n an tlawh a; hna thawktute chuan, thawh tur zawng zawng aṭanga 80% an thawh zawh tawh thu leh December 2023-ah Prime Minister hawntir an tum thu an lo hrilh.

MJA member-te hian Mualkhang, Sairang leh Sihhmuia hnathawh mekte an tlawh a; an president C Lalrambuatsaiha hoin Aizawl bakah, district hrang hranga MJA member-te an tel.

North Eastern Frontier Railways consultant Hrangtawna, IRTS (Rtd) chuan, hna ngawrh taka thawh a nih thu sawiin, "Harsatna kan tawh ber chu ruahtui tla rei lutuk a ni a, hna a chak thei lo. Ban phunna tur hmun khata zangnadawmna an dawn hnuah pawh in neitute'n in an chhuahsan duh mai lo a, ban phun lawk theih a ni lo. Tunah chuan ban phun ṭan a ni tawh," a ti.

Prime minister Narendra Modi-a'n November 29, 2014-a lungphûm a phûm tâk Bairabi-Sairang rél kawng tur hi km. 51.38-a thui a ni dawn a, a tirah cheng vbc. 2,384.34 ruahman niin, zawh hun tur chu March 2020 a ni. Tunah chuan sum senso tura tih chu cheng vbc. 5,000 a ni tawh a, a zawh hun tur pawh December 2023-ah sawn hlat a ni.

Bairabi-Sairang rél kawng hi a lian chi (broad gauge)-a siam a ni a, Hortoki, Kawnpui, Mualkhang leh Sairangahte chawlh hmun (station) siam a ni dawn. Rél kawng ah hian lei 196 dawh a ni dawn a, lei sei ber chu km. 1.04 (meter 1,042)-a sei tur niin, dawh mek a ni. Lei ban tur bik chu hmun pakhata phun mek bak chu phun zawh vek a ni tawh.

Leiverh (tunnel) 23 awm tur chu verh zawh vek a ni tawh a, a sei ber chu km. 1.733 (metre 1,733) a ni. Lei dawh tur zawng zawng sei zawng belh khawm chu km. 7 leh metre 27 a ni a, leiverh 23 sei zawng belh khawm chu km. 9 leh metre 9 a ni thung.

Bairabi-Sairang inkarah hian mihring phur rél tlantir tur niin, darkar khata km. 100-a chak thlenga tlantir a ni dawn a; bungraw phur chu darkar khatah km. 65 thlenga chaka tlantir theih a ni dawn.

Sairang aṭanga Bairabi inkar hi darkar khat chhung vela thleng thei tura ngaih a ni a, Sairang aṭanga Guwahati chu darkar 16 vela thlen theih tura chhût a ni thung a; hei hian chawlhhmun hrang hranga din hun chhung tur a huam tel.

Assembly session-a zawhna chhan a nih danin, Bairabi-Sairang rél kawng siamna atan mi 1,394 hnenah zangnadawmna pek a ni a, sum pek zat chu Rs 67,15,19,887 a ni.