ZPM kan sorkar chuan sorkar suma MLA car lei kan titàwp dawn - Duhoma

ZPM leader Lalduhoma chuan, sorkarna an siam a nih chuan, department inlaichìn tak takte chu minister pakhatin a enkawl dawn thu te, contract inpek dan an tihdanglam dawn thu te, boundary committee an din dawn thu te, sorkar suma MLA car lei an tihtawp dawn thute a sawi.

Nimina Champhai Bethel Vengthar community hall-a ZPM Champhai South Block Conferenceah thu sawiin Lalduhoma chuan, "Pathian leh mipui zara sorkarna kan siam thei a nih chuan department inlaichìn tak takte minister pakhatin a enkawl dawn. Sorkar kalphung tih awlsam kan tum a, sorkar dàwr dan awlsam mipui tan kan siam dawn," a ti.

Lalduhoma chuan, "Contract inpek dan kan tidanglam dawn a, boundary committee kan din ang a, chumiah chuan party tin leh NGO leh kohhran tin aiawh an tel dawn a, committee rêl dan angin ramri kan kalpui dawn," a ti a; Mizo mipui an pun theihna turin hma an lak dawn thu a sawi.

Mizoram sorkarin leiba a ngah hle tih sawiin Duhoma chuan, "ZPM-in sorkarna kan chan chuan sum renchem chungchangah hma kan la dawn. Sorkar suma MLA car lei kan titawp dawn a, MLA-te hamṭhatna hi a zahveah kan titlem dawn a ni," a ti.

Lalduhoma chuan, vantlang kutah thuneihna tam zawk an pe dawn tih sawiin, "Vantlang hi a neitu kan nih theihna turin kan kalpui dawn. Mi tlémtê kuta thuneihna a awm hian thil a kal sual ṭhin," a ti a; ZPM party mite chu mi dang lakah an danglam ngam tur a nih thu a sawi.

ZPM leader Lalduhoma chuan, ZPM-in kalphung thar an tih angin, an party inrêlbàwl dan a danglam thu leh collective leadership-a an kal thu a sawi a, "Committee thuin kan kal. Working president kan nei hi kan ṭhatpuiin kan ṭangkai pui em em. Kan páwl inawp danah tu mah kan ráwn lo a, ṭha kan tih angin kan kal mai a ni," a ti.

ZPM working president K Sapdanga chuan, ZPM-ah Pu Duha pawl, Pu Sapa pawl tiin party dangte'n nasa taka an beih thu a sawi a, "ZPM-ah Pu Duha pawl lian takin a awm a, chutah chuan kei pawh member ka ni," a ti a; Pu Duha pawl, Pu Sapa pawl tia beitute chu ngaidam turin mipui a chah.

K Sapdanga chuan, an leader Lalduhoma chu ZPM chief ministerial candidate a nih thu sawiin, "Hemi pawm lotu chu ZPM-ah an leng lo. Pathian leh mipui zarah chakna kan chang a nih chuan kan leader hi chief minister tur a ni a, MLA atan pawh amah thawhpui thei chi kan dah ang a, thláwp thei lo tan candidate nih a rem dawn lo a, minister atan pawh amah thawhpui thei lo tan hmun a awm dawn lo," a ti.

ZPM Working President chuan, ZPM chu páwl la naupang tak ni mah se, an dinhmunah an lawm thu a sawi a, "Pawl ṭhenkhat chuan hruaitu nihna kan inchuh dawn emaw an ti a, keini erawh chuan kan inhnawn a ni," a ti a; ZPM Val Upa Council chu an ṭhatpui tak zet thu a sawi bawk.

Inkhawmah hian Champhai South Block huam chhung aṭangin ZPM zawm thar mi 430 chu ZPM-ah K Sapdanga'n a lawm lut niin ZPM thuchhuah chuan a tarlang.