Samagra Shiksha leh infiamna pawl Pangate'n thawhhona thuthlung ziak

Mizorama Samagra Shiksha leh infiamna páwl pangate chuan nimin khan School Education conference hall-ah memorandum of understanding (MoU) an ziak a, School Education minister Lalchhandama Ralte-in telpuiin, Grassroot Sports Development Programme (GSDP) a hawng nghal.

Samagra Shiksha-in MoU an ziahpuite hi Mizoram Boxing Association, Mizoram Badminton Association, Mizoram Football Association, Mizoram Weightlifting Association leh Hockey Mizoram-te an ni.

Inremnaa an tarlan angin Mizoram hmun hrang hrangah GSDP centre 40 leh district tinah District Management Board din a ni ang a; board hian trainer leh assiatant trainer-te district sports association-te nen inráwnin an la ang.

Programme hi thla ruk chhung kalpui tur a ni a, centre tinah sorkar sikul naupang kum 6-14 inkar mi 30 (hmeichhia panga aia tlem lo telin) thlan an ni ang a, infiamna kaihhnawiha an theihna hai chhuak turin kaihhruai an ni ang. Naupang zirna tibahlah lo tur zawngin chawlhkar khatah vawi hnih/thum training neih tura ruahman a ni.

Minister Lalchhandama Ralte chuan, naupang theihna nei ṭha hai chhuahnaah a bulṭhut aṭanga thawh a ni dawn tih sawiin, "MoU kan ziah hi a field-ah thawh a ni ang a, sport discipline hrang hrangte'n theihtawp an chhuah ang a, ṭhalaite'n an la hlâwkpui hle dawn a ni," a ti.