Zangnadawmna sum pek phût vangin Vairengte-Aizawl kawng dan tum a ni

Land Owners' Association (Vairengte-Kawnpui Package 3-6 NH 06 & 306) joint meeting, Kolasib-a October 11, 2022-a neih chuan, NH kawngpui zauh turah October 24, 2022 thlenga zangnadawmna sum sem a nih loh chuan Mizoram luhka pawimawh, VairengteAizawl kawngpui dan (road block) an rêl.

LOWA Vairengte-Kawnpui chuan, zangnadawmna sum hi Mizo ram sorkar sum a ni lo a, sorkar laipui sum, ram neitute chanvo atana rawn kal a nih thu sawiin, "CALA account-ah July 8, 2022 khan an transfer (thun) tawh a, he pawisa hi land owner-te hnenah vawiin thleng hian sem lohin a la awm," an ti.

Zangnadawmna sum chu sem a nih vat theih nana hma laksak turin ram neitu pawl hruaitute'n Mizoram sorkar hotute ṭum thum an dàwr tawh tih sawiin LOWA chuan, "Mizoram sorkar hnuaia committee sang (GAD meeting) pawhin sem turin ṭum hnih thutlukna a lo siam tawh bawk," an ti a; dawng turte (award list) pawh tihchhuah vek tawh a nih thu te, dawng turte'n hming an ziah vek tawh thu leh, ram pass original an thehluh vek tawh thu an tarlang.

LOWA chuan, "Keini land owner-te chuan he pawisa hi sem theih loa hetia a awm reng mai hi kan mangangin kan hrethiam lo tak zet a ni. Kan sorkar pawhin hemi chungchang hi rang taka min chinfelsak ngei kan duh a, beiseina sang tak nen kan thlir mek a ni," an ti.