SEDP fi rst instalment kan sem mek, Kan la sem zel dawn - Dy CM Tawnluia

Deputy chief minister Tawnluia chuan, chhungkaw 60,000 hnenah Socio Economic Development Programme (SEDP) ṭanpui na sum, first instal ment sem mek a nih thu leh an sem zel dawn thu a sawi.

Khawhai khuain Mizoram Cleanliness Competition 2021-a faina lama hma sawn chak ber, Fastest Mover Award an dawn October 11, Thawhlehnia Khawhai Town Hall-a an lâwmnaah thu sawiin Tawnluia chuan, "Sorkar flagship programme SEDP first instalment chhungkaw 60,000 hnen ah kan sem mek a, kan la sem zel dawn a ni," a ti.

Deputy Chief Minister chuan, SEDP chu kawng hrang hrangin an hmang ṭangkai tih sawiin, "Zirtirtu indaih lohna khuaah SEDP teacher kan dah a, health worker nei lo khuaah SEDP hmangin health worker leh helper nen kan pe mek. Mipui chawi kân zel hi sorkar tum a ni," a ti a; intodelhna leh hmasawnna tura sorkar hmalaknate ṭawiawm zel turin mipui a sáwm.

Tawnluia chuan, ram dangte ang bawkin Covid-19 léng chu Mizoram pawhin a tuar nasa tih sawiin, "Kum hnih chhungin sum leh pai pawh hemi atan hian tam tak hman a ngai a, chuvang chuan kan hnathawh mekah harsatna kan tâwk a, chuti chung chuan Chief Minister leh minister dangte'n central hotute dàwrin theihtawp an chhuah reng a ni," a ti.

Dy CM chuan, Khawhai dîl, tlang leh historical site-te chu ṭhalaite intihhlimna leh khualzinte fuan khawmna turin chei tum a nih thu sawiin, "Khawhai leh Lungtan tui tlan tur Phaisen lui chu nizung chakna hmangin pump tum a ni a, nakkumah chuan hman theiha zawh hman tum a ni," a ti a; Khawhai Town Hall-a sound system tur lei a nih tur thu leh Khawhai damdawi-ina x-ray technician tur sorkarin a pek dawn thu a sawi bawk.

Award lawmna inkhawm hi Khawhai VC vice president Rohmingmawia'n a kaihruai a, Deputy CM-in lawmpuina atan vantlang inthiarna ṭha tak siamna tur sum a hlàn. UDPA director H Lianzela chuan, Mizorama khawpui (census town) 23-te fainaa inelnaah Khawhai chu kum 2020-ah 23-na a ni a, kum 2021-ah pasarihna a nih tak avangin Fastest Mover Award hlan a nih thu a sawi.