Biate-in khawpui fai ber an nih an lawm

Khawpui (census town)-te fainaa intihsiakah Biate khuain a záwna kum nga chhung khaw fai lawmman an dawn chu nimin khan Biate Town Faina Committee huaihawtin Zialung Hall, Biate-ah an lawm a, UDPA enkawltu deputy chief minister Tawnluia khuallian niin, bialtu MLA Lalchamliana, minister khualzahawm a ni.

UDPA department-in kum 2017 aṭanga 2021 thlenga khawpui fai intihsiak a buatsaihah Biate khua hi other urban towns category-ah pakhatna a nih bakah, a pumpuia khaw fai ber a ni tawh a; Swacch Survekhshan 2018-ah India hmarchhak bialah Best Innovation & Practices leh Swacch Survekhshan 2020-ah hmarchhak bikah Best Citizen Feedback a ni tawh bawk.

Khaw fai lawmman dawn lawmnaah hian Tawnluia chuan, Biate khua leh mipuite chu faina lama an hmalakna avangin Mizoram pum tan entawn tlak an nih thu a sawi a; sang zawka invawrh a, ṭan la zui zel a, Mizoram tan faina lama hma hruaitu ni a, entawn tlak ni zui zel turin a chah.

Tawnluia chuan, bawlhhlawh sâwngbàwl lama sorkar ṭan lak dante sawiin, Aizawl leh district khawpuiahte solid waste management centre siam a nih thu a sawi a, "Chhungkuaah bawlhhlawh ṭawih thei leh thei lo thliar kan inzirtir leh kan tih a pawimawh.

Bawlhhlawh hi engtin nge kan hman ṭangkai ang tih kan veia kan ngaih pawimawh a ṭul hle," a ti. Tawnluia hian Biate Town Faina Committee hnenah a záwna ṭum nga khawpui fai ber lawmman an lâk lawmpuina atan Rs 1,00,000 a pe a ni.

Khualzahawm Lalchamliana chuan, faina lamah a záwna ṭum nga pakhatna nih chu thil namailo a nih thu sawiin, "Eng dang vang ni loin, chhung tin leh mi tin ṭanrualna rah a ni," a ti a; faina leh hmasawnna chu eng emaw chen a kal kawp tih sawiin, "Faina hi hmasawnna bul a ni," a ti.

Inkhawmah hian UDPA director H Lianzela'n Mizoram Cleanliness Competition-a Biatein lawmman an lak tawh dan a sawi a; Biate VC president leh Biate Town Faina Committee chairman Lalrinliana pawhin thu a sawi.

Biate khua hi lal hun lai aṭangin faina lamah hma an la tawh ṭhin a, in leh lo fai lote chu leí an lo chawitir tawh ṭhin. Kum 1947-ah khawlai tihfai an ṭan tawh a, kum 2004 aṭangin YMA Sanitation SubCommittee-in faina lamah nasa zawkin hma an la thar leh bawk.