Champhai Winery collection centre hawng

Grape tharte Champhai Winery-a chhûn khawmna tur collection centre sak thar chu October 11, Thawhlehni khan Horticulture director Dr Elizabeth Saipari'n a hawng a; tun hnaia kohhran inkhawmpui ṭhenkhatah sacramental wine atan Mizorama grape thar aṭanga wine siam hman an rawt chu lawmawm a tih thu a sawi.

Champhai Winery-a collection centre sakna atan Rs 63,25,818 hman a ni a, Horticulture department aṭanga hmuh Rs 29,70,741 leh Champhai Grape Growers Society-te'n an tum Rs 33,55,077 hmanga sak a ni. Kum 2019 khan sak ṭan niin, chhawng thum, square ft. 3,838-a zau a ni a; grape metric ton 400 vel leng tura ngaih a nih bakah, office leh meeting room a awm.

Horticulture Director chuan, tun hnaia kohhran inkhawmpui ṭhenkhatah sakramen atana Mizorama grape thar aṭanga siam wine hman an rel chu lawmawm a tih thu sawiin, sacramental wine chu a hranpa taka siam wine pangngai nena inang lo a nih avangin a nih dan puanzar ṭula a hriat thu a sawi.

Dr Elizabeth Saipari chuan, khawchhak tlangdunga loneitute'n grape an chìn ṭan hnuah Horticulture department nen ṭang dunin chìn dan, enkawl dan leh sâwngbâwl dan ṭha zawkte zawng chawpin winery din a nih thu a sawi a, "Sûlsutute an fakawm a, a hlawhtlinna chu Horticulture department leh loneitute an ni," a ti a; grape chíngtute'n harsatna an tawhin department-in hreawm an tihpui ṭhin thu leh an hlawhtlinna chu department lawmna thlentu a nih thu a sawi bawk.

Champhai Winery collection centre hawnna inkhawm hi Champhai Grape Growers Society chairman HS Vanlalfakzuala'n a kaihruai a, factory manager Lalduhawma'n technical report a pe a ni.