Health Minister-in N Vanlaiphai PHC a tlawh

Health minister Dr R Lalthangliana chuan nimin khan North Vanlaiphai Primary Health Centre (damdawi-in) a tlawh a; medical officer Dr Lalzawmi leh thawktu dangte'n x-ray khawl an mamawh thu an lo thlen chungchangah, corporate social responsibility aṭanga hmuh veleh ngaihtuahsak an nih tur thu a hrilh.

Dr R Lalthangliana chuan, N Vanlaiphai damdawi-inin AYUSH doctor an mamawh chu a ṭul angte tihfel a nih hnuah a khaw mi ngei duhsak an nih tur thu te, a theih anga rangin ambulance pek an nih tur thute a sawi a; PHC aṭanga community health centre-a hlan kai an dil chu Covid-19 léng avangin post thar siam theih a nih rih loh thu a sawi bawk.

R Lalthangliana hian a bial South Tuipui huam chhunga Cherhlun, Ngharchhip leh New Ngharchhip khuate a tlawh nghal a, khawtlang hruaitute nen an inkâwm a, New Ngharchhipah health clinic a hawng.

Cherhlun CRC building-a khawtlang hruaitute nen an inkawmnaah, a biala khaw tê zawk tan health clinic pasarih an neih thar mek thu leh Mizorama khaw 237-ah health clinic thar din a nih tawh thu a sawi.