Health care bill bá chungchangah MPYCC-in court-a zualko an rilrûk

Mizoram State Health Care Scheme (MSHCS) hnuaiah Mizoram sorkarin damlote inenkawlna senso a bat rei lutuk avanga mipui thlavang hauh nan Mizoram Pradesh Youth Congress Committee (MPYCC) chuan high court-ah zualko zel an tum a; an hmalakna thláwp turin mipui an ngen.

MPYCC president Dr Lalmalsawma Nghaka chuan nimin khan Congress Bhavan-ah thuthar thehdarhtute a kâwm a; Mizoram sorkarin mipui health care bill a ba rei lutuk chu an ngaimawh thu leh chhungkaw sîng télin harsatna naménlo an tâwk mek chu pawi an tih thu sawiin, "Mi tam takin pûk chawpin MSHCS hmachhuanin damdawi-inah an inenkawl a ni," a ti a; bill an lâk leh theih si loh avangin an mangang a, an ro neih angte an hralh phah niin a sawi.

MSHCS-in damlote bill a bat chungchangah kawng hrang hranga hma an lak hnuah pawh sorkarin hma a la ṭha duh lo nia sawiin Dr Lalmalsawma chuan, "Mipui tawrhna enliam harsa kan ti. Sorkarah kan ukilte hmangin legal representation kan thehlut tawh a, vawiin thlengin chhànna kan la hmu lo.

Sorkar hian health care bill táng vanga mipui harsatna chinfel vat a tum lo a nih loh chuan court sang zawkah kal zel kan tum," a ti. MPYCC President chuan, MNF hruai sorkarin kawng hrang hrangin mipui a sawp nasa tih sawiin, "Sàwr fû theih zawng zawngah min sáwr fû zo tawh. Huaisen taka mipui thlavang hauh ngam an pên chhuah a ngai," a ti a; court sang zawkah PIL thehluh thlengin hma an lak dawn thu sawiin, an hmalakna thláwp turin mipui a ngen a ni.