KHAWTHLIR

Tui ren turin ngen
October 14, Zirtawpni hian Greater Aizawl Water Supply Scheme Phase-II-a Water Treatment Plant tihfai leh pump set delivery valve siamṭhat a nih dawn avangin hemi ní hian zing dar 8 aṭanga tlai dar 6 thleng GAWSS Phase-II aṭangin tui pump theih a ni dawn lo tih PHE department in an tarlang a; renchem taka tui hmang turin mipui an ngen.

RTI Act lemchan
Administrative Training Institute leh Lunglei DC pisa chuan Right to Information Act, 2005 awareness campaign neih mekah nimin khan Lunglei Sobji Bazar leh DC pisa tualah RTI Act chungchang inzirtirna lemchan (street play) an buatsaih.

Central-in enfiah
Tui hna humhalh leh ruahtui khâwl chungchanga sorkar laipui hmalakna, Jal Shakti Abhiyan: Catch the Rain central nodal officer Pawan Kumar
leh technical officer Jeeta Ram chuan nimin khan Lunglei district-a hmalakna an enfi ah a, Lungleia sorkar hotute nen an inkâwm bawk.
Sorkar laipui aiawhte chuan, Lunglei district-a hmalaknate chu ṭha an tih thu an sawi niin sorkar thuchhuahin a tarlang.

E.Roll ennawn dan tur sawiho
Aizawl DC Lalhriatzuali Ralte kaihhruaiin nimin khan a pisaah Electoral Roll Revision 2023 neih tura thil pawimawhte sawiho a ni. November 9, 2022-ah draft roll tihchhuah tur a ni a, November 9 aṭanga December 8, 2022 thleng dilna thehluh theih a ni ang a, final roll chu January 5, 2023-ah tihchhuah a ni ang.

Tlân theih loh
Tennis Court aṭanga Dinthar kawng (Kaisara Road) chu PWD-in vawiin leh naktuk hian zing dar 9:30 leh tlai dar 3:30 inkarah an siam dawn a, hei vang hian hna thawh chhungin lirthei tlân phal a ni dawn lo tih Traffi c SP Rodingliana Chawngthu-in a tarlang.

ICFAI leh CM
ICFAI University, Mizoram chancellor thar Prof. Haragopal Reddy leh a thawhpuite chuan nimin khan Chief minister Zoramthanga chu a pisaah an kâwm a, thawhhona ṭha neih zel an duh thu sawiin, an theih chinah course siam belh zel an tum thu an sawi.