2022-ah palliative care hmangin Health Minister-in N Vanlaiphai PHC a tlawh Damlo mi 1,085 enkawl a ni tawh

October 11, Thawhlehni khan Hospital & Medical Education conference hall-ah World Hospice & Palliative Care Day hman a ni a; kumin 2022 chhungin palliative care hmangin damlo mi 1,085 enkawl an ni tawh tih tarlan a ni.

World Hospice & Palliative Care Day hi damlo, dinhmun hlauhawma ding mekte leh an chhungte’n nun nuam leh hahdam zawka hun an hman theihna tura inenkawlna leh inzirtirna ní a ni a; Day hmanna hi NHM mission director Dr Eric Zomawia'n kaihruaiin, Health principal director Dr T Lalhmangaihi khuallian a ni.

Tarlan danin, kum 2021 chhung khan palliative damlo mi 2,090 enkawl niin, chu'ng zinga 532 chu damlo ziah luh belh an ni a, mi 209 chu admit an ni. Kumin 2022-a damlo mi 1,085 enkawl an ni tawh a, mi 324 chu admit an ni a; damlo ziah luh belh mi 399 an awm.

Palliative care-in a tum ber chu - cancer leh natna benvawn hrang hrang vanga damlo, dinhmun hniam leh thih hlauhawma ding mekte'n rilru hahdam leh zângkhai zawka hun an hman theih nan te, an na tawrh damdawi hmanga chhâwk zângkhai te, damlo enkawltu an chhungte thlenga nun hahdam zawka an awm theihna tura hmalakte a ni.

Mizoramah National Programme for Palliative Care (NPPC) hmalaknain October 2016 aṭangin palliative care kalpui a ni a, Serchhip, Saitual, Khawzawl leh Hnahthial district tih loh district dang zawngah kalpui a ni tawh.