MZP Computer Centre hawn a ni

Aizawl Pisapuia MZP Computer Centre (NIELIT Study Centre) din thar chu nimin khan Information and Communications Technology (ICT) minister Robert Romawia Royte-in a hawng. Centre-ah hian thla thum chhung zir, Course of Computer Concepts kalpui a ni a, zirlai 50 an awm mek.

Robert Romawia Royte chuan, information technology khawvelah chuan hriat phâk leh thiam phâk chin thiam zel chu mi vannei nihna a nih thu a sawi a; ICT minister a ni dawn tih a hriatin khaw hrang hranga internet connectivity leh mobile service awm dan a ngaihven thu sawiin, "Khua leh bial ṭhenkhatah network awm lohna a awm nual a, tunah erawh chuan network-in hma a sawn tawh," a ti a, ICT-in theihtawpa an beih vang a nih thu a sawi.

ICT department-in Mizoram Telecom Infrastructure Policy a duang chhuak tih sawiin Robert Romawia chuan, "Policy mumal tak avangin telecom company lo lutte tan awlsamna tam tak a thlen. Khaw 500-ah VISAT based connection kan dah thar. Chief Secretary-in theihtawp a chhuah a, CSR kaltlangin free wifi zone 500 siam kan tum," a ti.

MZP president Lalnunmawia Pautu chuan, MZP Computer Centre hlâwkna téltu tur chu zirlaite an nih thu a sawi a, an Computer Centre-a zirte chu tih tak zeta zir a, chhawr tlak thiamna nen chhuak ngei turin a chah. ICT chief informatics offi cer Dr Lalthlamuana leh NIELIT scientist(C) Vanlalhmangaiha Khiangte ten thu an sawi bawk.