Zo hnahthlakte hi rorelna pakhat hnuaiah Kan la awm ka besei tlat a ni - CM Hawla

Chief minister Lal Thanhawla chuan Zo hnahthlakte zawng zawng rorelna pakhat hnuaia an la awm a beisei tlat thu a sawi a, "Ṭawng hrang hmang mah ila, Duhlian ṭawngin min phuar khâwm tlat reng ṭhin a ni," a ti.

Nilaini zana YMA General Conference a hmanpuinaah thu sawiin Chief Minister chuan, Mizo hnam chu khawvel sakhaw lian pathumte hual kara awm, political boundary-in a ṭhen hran ni mah se, Chanchin Ṭha leh hnam ziarángin a phuar bet tlat sawiin, "Zohnahthlak zawng zawngte chi rorelna pakhat hnuaiah kan la awm ang tih hi ka beisei tlat a ni," a ti a; Mizoram chu Zo hnahthlak zawng zawngte Jerusalem, sorkar pawh Zo hnahthlakte sorkar a nih thu a sawi.

Lal Thanhawla chuan, YMA leh sorkarin thawhhona ṭha tak an neih thu sawiin, "YMA hian sorkar department ṭhenkhatte nen pawh thawhhona thuthlung an siam a. YMA hmalakna hrang hrang - ram leh hnam humhalh, faina, tuihna humhalh, nungcha leh ramngaw humhalhte hi a fakawm hle. YMA hi Mizoram mai ni lo, India ram pumpuia hriat hlawh a ni tawh a, ram leh hnam a din chhung chuan a awm zel dawn a ni," a ti.

Ram leh hnam humhalh nan hriselna leh faina a pawimawh hmasak thu sawiin CM Hawla chuan, "Zûk leh hmuam, vaihlo leh a kaihhnawih lakah fihlim a ngai a, ei leh in chenin fimkhur a ṭul," a ti a; nakin lawkah Mizoram rorelna leh venhimna hnam dang kuta a awm mai loh nan thalai tam zawk central service leh paramiltary force-ahte lut tura nasa taka ṭan lak a ngaih thu a sawi.

Chief Minister chuan YMA member kalkhawmte chu social media hmang thiam tur leh Mizo ṭawng hmang fimkhur turin a chah a, "Ṭawng mawi leh hausa tak kan neih hi kan humhalh tlat a ngai. Kan ram hi leilung hausa tak leh sik leh sá nuam tak a ni a, hei hi chhawr thiama intodelh nan hmang thiam turin ṭan kan lak tlan a ngai. Nakkin lawkah ram intodelh leh hmasawn kan nih theih nan sorkarin NLUP flagship programme a kalpui a ni," a ti.

Border trade lamah pawh nasa taka ṭan lak a nih thu sawiin Lal Thanhawla chuan, "Myanmar nena insumdawn tawnna Zokhawthar, Bangladesh nena insumdawn tawnna Kawrpuichhuah, South East Asia ramte nena insumdawn tawnna tur Bay of Bengal-a Akyap lawng chawlhnate buatsaih kawngah pawh chak taka hmalak mek zel a ni," a ti a; Bairabi aṭanga Mizoram chhim lam thleng rel a thlen theihna atan pawh hmalak a nih thu a sawi bawk.