MSSU hnuaiah zirtirtu leh zirlai mi 4,33,793 an awm

Kum 2017 chhung hian Mizoram Presbyterian Kohhran hnuaia Mizo Sunday School Union (MSSU) hnuaiah hotu te, zirtirtute leh zirlai zawng zawng awm zat chu mi 4,33,793 an ni.

October 18, Nilaini khan Synod Office-ah MSSU Committee meeting vawi 161-na neih a ni a, Synod moderator Rev. Lalzuithanga’n a kaihruai. Secretary report-a a lan danin, kum 1967 aṭangin sunday school chawimawina chi hrang hrang sem a ni a, kum 1967 aṭanga kumin thlenga chawimawina dawng tawh zawng zawng chu mi 40,920 an tling tawh.

MSSU hian kumin chhungin pastor bial huap training vawi 34 an nei tawh a, kohhran malah vawi 37 an nei tawh bawk. Training neihpui hian MSSU office-a hotute leh trainer-te an kal ṭhin. Kumin chhung­in lehkhabu - Sunday School Zirlai bu hrang hrang leh a dangte nen bu 18 an tichhuak a; kumin aṭangin sunday school flag siam a ni bawk.