KHAWTHLIR
Kohhran ngen
Mizoram People Forum (MPF) chuan thuchhuah siamin, tunlai hian Mizoram chhung hmun hrang hrangah political education seminar leh awareness campaign an buatsaih thu an tarlang a; awarness campaign hlawhtling taka an neih theihna atana ṭawngṭaisak turin kohhrante an ngen a ni.
Women convention
Bible Society of India, Aizawl Auxiliary-a Mary Jones Women's Fellowship chuan, Nilaini khan Women Convention vawi khatna, Synod Conference Centre-ah an hmang a, thupui chu 'Chanchin ṭha mi tin tan' tih a ni. Inkhawmpui thupui hmang hian Rev. Vanlalbela'n thuchah a sawi.
Nupui nei
Aizawl Post news editor Zohmingmawia leh Margaret M Sailo d/o Nunthari Sailo, Vaivakawn-te chu nimin khan Republic Veng Presbyterian Kohhran Hall-ah an innei.
Heroin man
Mizoram Police-te chuan October 18, Nilaini zing khan Tuivamitah heroin hawng hnih (gm. 26.15) leh a neitua puh SB Khuppaua (53) s/o Langngoa, Tuivamit an man a, Vaivakawn Police Station-ah thubuai an siamsak. Heroin hi tualchhunga hralhna ang chuan Rs. 90,000 hû a ni.
Pawngsualtu táng turin ti
Champhai District Court-a Additional Sessions judge R Vanlalena chuan, Vauzau khuaa mahni fanu kum 11 vel mi pawngsualtu chu kum 10 táng tur leh Rs. 9,000 chawi turin October 18, 2017 khan a chungthu a relsak. Naupang pawngsual hun hi kum 2013 a ni a, hriat chhuah a nih hnuah naupang pu (a nu pa)-in February 10, 2015 khan Champhai Police Station-ah FIR a thehlut a ni.