SEDP sum hman dan endik dawn ; February 15, 2023-ah 2nd instalment Pek chhuah kim hman vek tura tih a ni
Mizoram sorkar flagship programme, SEDP hnuaia ṭanpuina dawngtute'n an trade thlanah hma an la ngei em tih enfiah a ni dawn. SEDP hi first instalment Rs 25,000 chu October 31, 2022 chhungin a dawng turte hnena pek kim tur a ni a, second instalment Rs 25,000 pawh February 15, 2023-ah pek kim hman tura tih a ni.
Planning & Programme Implementation department-in notification a tihchhuahah chuan, SEDP ṭanpuina dawng tura thlante'n first instalment pek an nih hnuah an trade thlanah hma an la tur a ni a; a hmanna tur dik takah an hman ngei theih nan district tinah District Level SEDP Committee kaihhruaiin village level committee-te nen endik tur a ni.
Second instalment pek zawhah ṭanpuina dawngtute'n an pawisa dawn an hman ṭhat leh ṭhat loh district level SEDP committee kaihhruaiin district-a department office-te'n endik tur a ni bawk a; village/local committee-te'n a ṭul angin an pui ang. Department inspection report chu SEDP Executive Board-ah thehluh tur a ni.
Endik bakah hian department-te'n Endline Evaluation Report an buatsaih tur a ni a; hei hi department-in scheme a kalpui dan leh a hlawhtlin dan zirna a ni a, rawtna an siam thei a, sample survey anga kalpui tur a ni. Third party atan Mizoram University emaw, college emaw, NGO emaw rawih theih a ni ang.
Pawisa dawn hmang ṭha lo emaw, a hmanna tura hmang lo inspection report-a târlante chu family oriented SEDP awm zel turah telh an ni tawh dawn lo. Department-te'n district SEDP committee leh village/local committee-te hriatpuinain hna thawk ṭha bik chhungkaw panga thleng an thlang thei a, chung mite chu SEDP Governing Body remtihpuinain chawimawina leh lawmman pek theih an ni thung.
Ruahman dan chuan, family oriented SEDP thawh khatnaah hian second instalment February 15, 2023-ah pek chhuah kim tur tih ni mah se, a ṭul angin tihdanglam theih a nih thu tarlan tel a ni.