Serkhan-Bagha kawng siam vat phût

Serkhan-Saipum inkara village council-te leh YMA group pahnih - Pualreng leh Sakawrhmuituai group hruaitute ṭhukhawm chuan, a rang thei ang bera Serkhan-Bagha kawngpui thawm ṭhat an phût a, kawngpuiah lirthei lian (HMV) tlân an remti lo.

VC leh YMA hruaitute ṭhukhawm chuan, "Serkhan-Bagha road kawng hi kum 2019 khan blacktop zawh chauh a ni. Tun hnaiah motor lian (HMV) tlânin nasa takin kawng an tichhe mek a, kawng hi hawn a la ni lo. Kawng hi Vairengte checkgate hêlna atana hmangin sumdawng motor lian, rit tak tak phur an rawn kal ṭhin a, rei lo tê chhungin kawng an rap chhia hi a pawi kan ti hle. Kawng hi a rang thei ang berin sorkarin min siamṭhatsak rawh se," an ti.

Kolasib SP thupek tlawh­chhanin Serkhan-Bagha kawngah lirthei lian tlàntir loh an rèl thu tarlangin VC leh YMA hruaitute chuan, "Kolasib SP order-ah hian Sihphir via Aizawl kawngah gas phur, etc. HMV chin tlan a phal lo a, Serkhan-Bagha kawng paltlanga motor lo kalte hi SP order huam chhung kawngah an tlân tlang ngei tura ngaih a ni," an ti a; Serkhan-Bagha kawngah lirthei lian tlân lui an awm chuan an thiam ang anga hma an lâk tur thu an tarlang a ni.