GPF leh damlo bill báte Krismas hmaa pe vek turin ZPM Ṭhalaiin sorkar phût
ZPM Ṭhalai chuan, Mizoram sorkarin pensioner-te General Provident Fund (GPF) a hrên mek chu pe chhuak thuai tur leh health care bill bat mekte chu kumin Krismas hma ngeia pe vek turin sorkar an phût.
ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; senior vice president Dr C Lalrammawia chuan, Mizoram sorkar aṭanga pension hlim mi 1,367-te GPF tur Rs 2,49,87,07,426 chu Mizoram sorkarin treasury-ah a hren mek thu leh health care bill Rs 77,97,69,971 a la bá tih a sawi.
Dr C Lalrammawia chuan, "Sorkarin pensioner-te GPF a pek chhuah duh loh avangin pensioner-te mangang chuan September 29, 2022 khan Union Finance Minister hnenah an thlen a, SOS message hial an thawn a ni," a ti a; pensioner-te Union Finance Minister hnena zualko ngai khawpa an awm chuan sum enkawlah Mizoram sorkar hlawhchhamzia a tarlan thu sawiin, "MNF sorkar tan thil mualphothlak tak a ni," a ti.
Pensioner-te'n an hlawh ngei aṭanga an khâwl Rs 2,49,87,07,426 lai MNF sorkarin a hrêkbehsak chu an dem thu sawiin C Lalrammawia chuan, "SEDP sum tlemtê an sem hnuah MNF sorkar a tâlbuai zual hle. Pu Zoramthanga'n opposition-a an awm laia 'Bang chhak lam sah thlaka bang thlang lama bel' a tih ṭhin chu SEDP ngei hi a ni," a ti a; GPF chu a rang thei ang bera pe chhuak thuai turin sorkar an phût tih a sawi.
Dr C Lalrammawia chuan, health care bill 28,448-ah sorkarin Rs 77,97,69,971 a la bá tih sawiin, "MNF sorkar hnuaiah mipui kan him lo hle. Heti zat health care bill bá a awm leh a kum têla health care-a inziak lut an tlahniam hian MNF sorkarah mipuite'n an rinna an nghah ngam tawh lohzia a tilang chiang hle," a ti.
Health care bill bâ rulhna atana SEDP untied fund aṭanga cheng vbc. 20 ruahman chu saṭahchhuakpêk ang chauhah mipuiin an ngaih thu te, Health Minister hlawhchhamna leh mualphonaa an ngaih thu te, bill bá zawng zawng chu a dawngtu tur dik takte hnenah kumin Krismas hma ngeia pe vek tura sorkar an phût thute a sawi bawk.