Sialhawka zirna luh kum 100-na lâwm

Sialhawk chuan an khuaa zirna a luh kum 100 tlin nimin khan an lawm a, bialtu MLA Tawnluia, deputy chief minister-in hmanpuiin, hriatrengna lungphun a hawng. Tun dinhmunah Sialhawk khuaah sikul pasarih a awm.

Tawnluia chuan, Sialhawkah kum 100 chuang zirna kalpui a ni chu khawtlang leh mipui a lawmpui thu sawiin, "A lawmna buatsaih a ni hian zirna an ngaih pawimawhzia leh an ngaihsanzia a tilang. Zirna tel loin hmasawnna leh changkanna tak tak a awm thei lo. Finna leh hriatna bul a ni a, hlawhtlinna leh chanvo ṭha min petu a ni," a ti.

Sialhawk khua, Mizoram puma lakhuihthei chíng tam ber a ni chu ropui a tih thu sawiin Tawnluia chuan, "Lakhuihthei thar lama in hlawhtlinnate hi chhuanawm tak a ni," a ti a, lakhuihthei hralhna tur ṭha zawk sokarin a ngaihtuah mek thu a sawi.

Inkhawmah hian Sialhawk High School principal Lawmsanga'n Sialhâwk khuaa zirna bul ṭan dan leh hmasawn zel dan a sawi a; T Romana College-a assistant professor CVL Thanhlua'n thupui 'Hmasawnna bulpui zirna' tih a sawi bawk.

Sialhâwk khua hi kum 1895-ah Sailo lal Vuttaia thih hnuah a nupui Neihpuithangi hoa din a ni a; kum 1920 khan Lower Primary School din niin, Welsh Mission hnuaia zirtirtu atana lâk K Rumliana chu zirna bul ṭantu a ni. Kum 1945-ah middle school din a ni a; kum 1963-ah high school din ni mah se, harsatna vangin kum tam tak a kal thei lo a, chumi hnuah din thar leh tawh a ni.