MNF hi mi pangngai chin chuan luhna tlakah an la ngai - Vanlalzawma

MNF vice president Vanlalzawma chuan nimin khan Aizawl South-III MNF Block ṭhalaiin ITI Venga mi thar lawm luhna inkhawm an buatsaihah thu sawiin, MNF party chu mi pangngai chin chuan luhna tlakah an la ngaih thu a sawi.

MNF Vice President chuan, an party chu social media lamah archuk tui lo khawpa chhuah ni mah se, mi pangngai chin chuan luhna tlakah an ngai niin a sawi a, "Mi pangngai tak tak, pawl hruaitu ṭha tak takin tun hnaiah pawh an rawn zawm thar zel. Hun lo la kal zel tur ngaihtuah chungin MNF-a rawn lutte hian rilru an séng a ni tih a hriat. Congress leh ZPM chu beisei tur an awm lo," a ti.

MNF chu Pathianin a hruai tih sawiin Vanlalzawma chuan, "Kan hotute hian hun khirh tak an paltlang tawh a, Pathianin min hruai tlat a ni. Political party-te hi inang deuh ṭhúm e ti lo chuan, MNF hi chuan danglamna tak kan nei," a ti a, MNF chu ram leh hnam tana mi huaisente thisen kal zelin a hrin a nih thu a sawi.

Vanlalzawma chuan, Mizoram sorkarin Myanmar raltlante a dawnsawn danah ram dang pawhin an fak nia sawiin, "Kan hnampuite kan lo kuah khawm dan hi khawvelin mak a ti a, kan ze dik tak kan lan chhuahtir mek zel. MNF chu ramhnuai hun lai pawha ei leh in leh silhfen thlenga inpe tawna inṭâwm ṭhin kan ni. Kawng engkimah belhchian kan dâwl a, MNF hi a ral mai mai dawn lo," a ti.