KHAWTHLIR
Thisen pe
Nimin khan J Thankima College chuan an college-ah Civil Hospital, Aizawl tan thisen unit 40 an pe. Thisen petute hi first semester zirlaite an ni a, mipa 34 leh hmeichhia paruk an ni. KṬP, Chhinga Vengthlang Branch pawhin nimin khan Synod Hospital tan thisen unit 40 an pe a, petute mipa 33 leh hmeichhia pasarih an ni.
Pastor nupuite Intawhkhawm
Mizoram Presbyterian Kohhrana pastor leh probationary pastor nupuite chuan nimin khan Synod Conference Centre-ah intawhkhawm vawi 42-na an nei a, pastor/pro.pastor nupui 173 an tel. Intawhkhawmah hian chawhma lamah Dr Ruth Lalmuanpuii w/o Rev.Dr K Lallawmzuala ziah 'Rilru hrisel' tih zirho a ni a, chawhnuah intihhlimna hun hman a ni. Pastor nupuite hian kum tin intawhkhawm hun an buatsaih ṭhin.
Shikhar man
Aizawl District Anti Tobacco Squad leh Food and Drugs Administration (Aizawl East)-te chuan nimin khan Aizawlah Gutkha aṭanga siam thil zuar an awm leh awm loh an endik a, Food Safety Standard Act, 2006 hnuaiah Shikhar leh SS1 1,443 an man. Gutkha aṭanga siam chhuah thilte Mizoramah zawrh leh hralh khap a nih thu an tarlang.
Lehkhabu tlangzarh
Lalhmachhuana Zofa lehkhabu ziah pahnih, 'Mizoram Political History' (Record & Document) leh 'Mizo lui hmingthangte' tih chu nimin khan minister of state Robert Romawia Royte-in a pisaah a tlangzarh. Minister chuan, ram changkang leh hnam pui zawkte'n lehkhabu an chhiar nasa tih sawiin, Mizote pawhin lehkhabu chhiar an uar a, an intihhmuh deuh deuh a ṭul thu a sawi.
Loneitute tel dawn
India ram pum loneitu hlawhtlingte inhmuh khawmna, Agri Start-up Conclave leh Kisan Sammelan, New Delhi-a neih tura tel tur Mizoram district hrang hranga loneitu hlawhtling thlante chuan nimin khan New Delhi an pan. Agri Start-up Conclave leh Kisan Sammelan hi October 17, 2022 hian prime minister Narendra Modi hoa neih tur a ni.
ELF sikul endik
Lunglei DC Kulothungan A, English Language Forum (ELF) kalpuitu Learning Solutions hnuaia project manager pahnih leh documentation official-te chuan nimin khan Lunglei district-a ELF kalpuina sikul hrang hrangte an tlawh a, zirtirtute nen chak zawka hmalak dan tur an sawiho. ELF hi zirlaite'n sap ṭawng a bulthûm aṭanga an zir theihna tura hmalakna a ni a; Lunglei district-a sikul 61-ah kalpui niin, primary school naupang 3,000 velin an zir a ni.
Hmalakna endik
Fisheries dept. hnuaia centrally sponsored scheme kaltlanga hamṭhatna dawngtute hmalak dan endiktu Departmental Monitoring Team chuan October 10-13, 2022 chhung khan Champhai leh Khawzawl district-a hmalaknate an endik. Team member-te chu Champhai leh Khawzawla district fisheries association hruaitute nen an inkâwm bawk.