Mizoram dinhmun thlirin kohhrante pawh an mangang tawh - Lalduhoma ; Kan party hi sumah kan innghat ve lo - K Sapdanga

ZPM leader Lalduhoma chuan, Mizoram dinhmun thlirin, kohhrante pawh an mangang tawh nia a lan thu leh mipuite’n ram hruai tura innghahna an neih chhun chu ZPM party a ni ta bera a lan thu a sawi.

Lalduhoma hian Nilaini zan leh nimin khan Champhai Zote leh Ngur khuaa vantlang inkhawmah thu a sawi a, "Kan ram dinhmun hi ngun takin han thlir ila, kohhran pawh a mangang tawh a ni. Kumina presbytery inkhawmpuiah sorkar inrêlbâwl dan hawi zawngin agenda pass a awm nual a ni," a ti.

Kohhrante'n ram an vei a, ram leh hnam tun din thar an duh chu Bible aṭangin a dik tih sawiin Duhoma chuan, "Thuthlung Hlui kan en chuan ram chhiat leh ṭhat thu-ah pawh ram roreltu an pawimawh em em a, mawhphurtu ber pawh an ni," a ti a; Mizorama Pathian ram a thlen theihna tura hna thawka ram siamṭha turin ZPM an inpumpek thu a sawi.

Lalduhoma chuan, "Kan ram politics vir vel han thlir ila, Zoram mipuite’n innghahna kan neih chhun chu ZPM party hi a ni ta berin a lang. Pathian zarah mi thar duhawm tak tak lawm luh tur kan neite hi kan thawh rah a ni lo a, min thawhsaktu a awm a ni," a ti a; mi ṭhenkhatin sorkar an châk chhan chu ram leh hnam an vei vang ni loin, eiru leh ila, tih rilru pua ram rawng báwl an nia a lan thu a sawi bawk.

ZPM working president K Sapdanga pawhin thu sawiin, "Kan party hi sum leh paiah kan innghat ve lo a, Pathianin ro fel takin a rél ang a, chumi-ah chuan lungawi taka awm kan tum," a ti a; Mizoram inthlanpui awm leh turah duhthlanna fím tak hmang a, chhia leh ṭha hriatna thiang tak nen vote thlâk turin mipui a ngen.

K Sapdanga chuan, Pathian kuta tlûk luh chu him dam taka ram tun din theihna hmanraw ṭha ber a nih thu sawiin, "He ram hi mi hausate intihsiakna ramah i siam lo hrâm ang u. Engtin nge kan ram a intodelh ang a, engtin nge mirethei zawkte an dinchhuah ve theih ang tih ngaihtuah chungin vote kan thlak tur a ni," a ti.

ZPM chu pawl hrang hrang awm khawm an ni tih sawiin Sapdanga chuan, "Lungrual taka kan awm theih chhan chu politics-a hun rei tak lo inchiah tawh leh tawn hriat ngah tak takte inphah hniam theih vang a ni. Thluaka sum lut hi mipuiin kan vei ve ang tih kan hlau ngawih ngawih a, candidate-te sum leh pai dinhmun en chunga mipuiin inthlan kan hmachhawn chuan thluaka sum lut kan vei ve tihna a ni ber ang," a ti bawk.

ZPM thuchhuah chuan, Zote khuaah mi 14 leh Ngur khuaah mi 31 ZPM-ah an lawm lut tih a tarlang.