Thangtea'n Thingsai PS a hawng

Minister Dr R Lalthangliana chuan nimin khan a bial South Tuipui chhunga Thingsai Police Station a hawng a; MNF sorkar hmasak laiin police battalion pali an din a, Congress sorkarin police an lâk loh avangin thawktu indaih lohna a nasa niin a sawi.

Dr R Lalthangliana chuan, "MNF sorkar hmasaah khan police battalion pali kan la a, Congress sorkar kum 10 chhung khan an la si lo a, thawktu indaih lohna a nasa hle. Hengte hi kan sorkar thar hian a hria a, theihtawp chhuah zel a tum. Covid vanga hma kan la thei lo erawh a pawi kan ti hle. Burma nen km. 400 chuang leh Bangladesh nen km. 300 chuang kan inrî a, a chángin ramri a buai a, police kan mamawh belhna a nasa a ni," a ti.

Minister hian Thingsai PS hnenah solar light a pe a; DGP Devesh Chandra Srivastava pawhin thu sawiin, police-te'n ruihhlo donaah hma an la nasa a, police-te hmalakna thláwp turin mipui a ngen.

Thingsai PS hi kum 2018-ah sak ṭan niin, kum 2021-ah sak zawh a ni a, a sakna atan Rs 65,74,500 hman a ni.

MNF adviser Dr R Lalthangliana chuan nimin vêk khan Thingsaia martar hriatrengna lungphun a hawng a; Bualpui, Khawhri, Aithur, Tarpho leh South Chawngtui khuate a tlawh bawk.

Martarte hriatrengna lungphun a hawnaah Dr R Lalthangliana chuan MNF chu tualṭo party zinga upa ber, kum 60-na lawm thei awm chhun, 'Pathian leh kan ram tan' tia ding awm chhun party an nih thu sawiin, "Kan danglam bik a ni. A dintute kha mi ropui leh fing ber an ni lo a, mahse, Pathian rinchhana innghat tlat an nih avangin Pathianin mal a sawm a ni," a ti.