Governor-in Saitual district a tlawh

Governor Dr Hari Babu Kambhampati chuan nimin khan ni hnih chám turin Saitual a tlawh a, DC conference hall-ah sorkar leh bank hotu bakah, kohhran, political party leh tlawmngai pawl hruaitute a kâwm.

Dr Hari Babu Kambhampati chuan, Saitual chu district naupang tak ni mah se, hmasawnna kawng a zawh mek nia a hriat thu a sawi a, "Faina intihsiaknaah Mizoram puma district fai ber dinhmun in ni nghal theite hi in chhuanawm tak zet a ni," a ti.

Governor chuan, sorkar hotute chu zirna leh kawlphetha dinhmun te, tui in tur sem chungchang te, MGNREGA hmalakna te, Agriculture, Horticulture leh UDPA hnuaia hmalaknate a zawt a; mipui tan theihtawp chhuah turin a fuih.

Mi tam tak a kawm tawhna aṭangin PMSBY, PMJJBY leh PMUY scheme-te chu mipuiin an hre chiang lo hle tih chu a ngaihdan a nih thu sawiin Larsap chuan, "A hlâwkna tél thei pawh an la tlem hle niin ka hria a, a pawi hle a ni," a ti a; mipui zirtir kawngah nasa zawka ṭan la turin a chah.

Saitual DC VL Hruaizela Khiangte tarlan danin, kum 2018 khan Saitual chu district atan siam a ni a, kum 2019 aṭangin a taka kalpui a ni. Saitual district chu sq.km. 1,757.34-a zau a ni a, sorkar department pisa 23 a awm tawh. District chhungah khua 40 a awm a, mi 61,108 vel an chêng mek a ni.