MPYCC-in property tax pung an dem

Mizoram Pradesh Youth Congress Committee chuan, MNF kaihhruai Aizawl Municipal Corporation sorkarin property tax an tihpun nasat thu leh an dem thu an tarlang.

MPYCC thuchhuah chuan, AMC property tax chu a pung nasa tih sawiin, "A ṭhenah chuan a lêtte'n a pung hial tawh. Hei hian in leh dawr luah mante thlengin a nghawng nasa em em a, mi rethei leh harsa zawkte'n property tax pung hi kan tuar nasa lehzual a, mipui sàwr fê zual zelna hi kan dem a ni," an ti.

Congress ṭhalaite chuan, "Mizoram sorkar hian mipui hi nasa takin min sáwr fê tawh a, kawng hrang hrangah chhiah a pung nasa em em," an ti a; ni tin mamawh chhiah nasa taka a pun avangin Mizo mipui tan MNF hruai sorkar chu phurrit sorkar a nih tawh thu an sawi.

MNF sorkarna chelh hnua kawng hrang hranga chhiah pung chu phurh zawh rual a ni tawh lo nia sawiin MPYCC chuan, "Chhiah lâk theihna mit-in an meng a, mipui min ngaih pawimawh lohzia an pholang. Cheng nuai thum sem tur pawh sawi rîk ngam a ni tawh lo," an ti.