Minister-in zaipawl lawmman a sem

Art & Culture minister R Lalzirliana chuan nimin khan Art & Culture department leh Central YMA ṭang dunin Aizawla YMA branch-te tana Ramngaih Hla Zaipawl Intihsiak an buatsaih khârna Vanapa Hall-ah a hmanpui a, lawmmante a sem.

R Lalzirliana chuan, rual úte'n an rilru sénga pipu nun mawi a liam mai lohna tura ram ngaih hla ṭha tak tak an lo phuah chu ropui a tih thu sawiin, "Zo nun mawi hi ral mai loin ṭhangtharte'n chhawm nung zel se, an duhnate tipuitling zel turin zaipawl intihsiak hi ruahman a ni," a ti.

Art & Culture Minister chuan, intihsiak chu zaipawlte thiamna leh mawina ringawt ni loin, tlawmngaihna, huaisenna, aia upa zahna, rinawmna, pipute nun hlui leh ram mawi tak chawi lârna tura buatsaih a nih thu a sawi a; intihsiaka telte inpuahchahna ropui a tih thu a sawi bawk.

YMA zaipawl intihsiakah hian AMC huam chhunga YMA branch 34 an tel a, Dawpui Branch pakhatna an ni. Intihsiak khàrna inkhawmah hian Art & Culture director R Hmingthanzuala leh Central YMA hruaitute pawh an tel a ni.