Champhaiah wine rules thar lawm a ni

Mizoram sorkarin Grape Wine Rules thar a siam chu Champhai Grape Growers Society chuan October 12, Nilaini khan Champhai Winery packing hall-ah an lawm a, Excise & Narcotics minister Dr K Beichhua'n a hmanpui.

Dr K Beichhua chuan, wine rules thar siam a nih avangin Champhai mipui chauh ni lo, Mizoram mipui an lawm thu a sawi a, "Politics kal dik leh fuh hmangin ram hmél a thlâk danglam theih a, politics siamṭhat kawngah ṭanrual a ṭul," a ti.

Excise & Narcotics Minister chuan, grape chíngtute chu grape ṭha leh changkang zawk, thianghlim zawk, tam leh hrisel zawk thar tum turin a chah a; ruihhlo leh a kaihhnawih donaah sorkar ṭawiawm turin Champhai district mipui a sáwm bawk.

Wine rules thar lawmna inkhawm hi Champhai Grape Growers Society chairman HS Vanlalfakzuala'n a kaihruai a; MLA pahnih - Health & Family Welfare Board vice chairman Dr ZR Thiamsanga leh Commerce & Industrial Development Board vice chairman K Laldawngliana te pawhin thu an sawi.

Champhai Grape Growers Association tih ṭhin chu winery din a nih dawn avangin kum 2007 khan Champhai Grape Growers Society tia thlak a ni a, member 135 leh thawktu mi 30 an awm mek.

Mizoram Intodelhna Project (MIP) aṭanga pek cheng nuai 83 hmangin bul ṭan a ni. Kum 2010-ah grape quintal 918 leiin bul ṭan a ni a, kuminah grape quintal 1,144.98 an lei tawh a ni.