Silk pangang vulhtute cocoon thar enpui

Sericulture minister Dr K Beichhua chuan nimin khan Champhaia Sericulture pisa a tlawh bakah, silk pangang vulhtute cocoon thar a enpui a; pangang khawi chu eizawnna tlak leh hmabak êng tak nei a nih dan uar zawka puanzar lamah ṭan la zual turin thawktute a chah.

Sericulture officer Hmingthantluangi tarlan danin, Champhai district-ah pangang khawi chhungkua 87 leh Khawzawl district-ah chhungkua 55 an awm mek a; SEDP hnuaiah ṭanpuina Champhai district-ah mi 19 leh Khawzawl district-ah mi 63 an awm.

Kuminah Champhai leh Khawzawl district-a silk pangang khawitute'n cocoon metric ton 3.8 an thar tling tawh. Champhaiah sericulture farm pahnih - Mulberry Seed Farm leh Oak Tasar Seed Farm a awm a, Oak Tasar Farm bik chu Mizorama awm chhun a ni.