Covid-19 vei zat a tlahniam zel

October 12, Nilaini khan Mizoramah Covid-19 vei mi pali chiah hmuh chhuah a ni a, nimin khan mi 13 chhuahtir niin, hripui vanga thi an awm belh lo. Nimin tlai khan Covid-19 positive mi 67 chiah awmin, an tlem tial tial.

IDSP aṭanga thu dawn danin, October 12-a Covid-19 positive pali hmuh chhuah chu swab sample 141 endik aṭangin 2.84 chiah a ni a; positive hmuhna district-te chu - Aizawl district-ah mi pahnih leh Lunglei leh Mamit district-ah mi pakhat ve ve an ni.

Mizoramah swab sample 19,85,466 endik tawh niin, Covid-19 vei 2,38,637 hmuh chhuah a ni tawh a, 12.02% a ni. Nimin tlai dar 5 thlengin mi 2,37,847 (99.67%) chhuahtir an ni tawh a, mi 723 (0.30%) thi tawhin, enkawl mek mi 67 (0.03%) an awm.

Mizorama district 11 zingah Siaha, Champhai, Kolasib, Lawngtlai leh Hnahthial district-ahte Covid-19 vei mek an awm tawh rih lo. Heng district-a positive hmuh hnuhnun ber ṭum chu - Lawngtlaiah September 27, Champhai leh Hnahthialah October 3, Siahaah October 6 leh Kolasib-ah October 7 a ni.